ԱՐԱՐԱՏԲԱՆԿ-ն ընդլայնել է «Կանաչ» վարկերի շահառուների շրջանակը

ԱՐԱՐԱՏԲԱՆԿԸ մեկնարկել է 2016թ․-ից իրականացվող  էներգախնայող վարկավորման երկրորդ փուլը։  «Կանաչ» վարկային  ծրագրի  1-ին փուլում  ընդհանուր առմամբ   762,238,334 ՀՀ դրամ գումարի չափով վարկային միջոցներ են հատկացվել  12  ընկերությունների՝  էներգախնայող ներդրումների համար։ Եթե վարկատեսակը 2016-2018թթ.-ին տրամադրվել է բացառապես առևտրի, արտադրության, ծառայությունների մատուցման, բեռնափոխադրումների, ինչպես նաև  հյուրանոցային ոլորտի ընկերություններին, ապա  2019թ․-ի  տարեվերջից բանկն ընդլայնել է վարկավորվող ուղղությունները՝ «Կանաչ»  վարկավորման շրջանակներում ընդգրկելով նաև գյուղատնտեսության ոլորտում զբաղված տնտեսվարող սուբյեկտներին  և  անհատ գյուղացիներին։ Վարկը տրամադրվում է  ՀՀ դրամով՝ 1.000.000-500.000.000 ՀՀ դրամի չափով։ Վարկի տարեկան անվանական տոկոսադրույքը  կազմում է 10 տոկոս, իսկ մարման ժամկետը մինչև 5 տարի։  Նշենք նաև, որ  այս  փուլում  ՀՀ տնտեսության վրա էական դրական ազդեցություն ունեցող ներդրումային ծրագրերի համար վարկի գումարը կարող է հասնել մինչև 1,000,000,000 ՀՀ դրամի։

Ընդլայնվել է նաև վարկի նպատակային շրջանակը՝  կապիտալ ներդրումներին և հիմնական միջոցների ձեռքբերմանն ավելացել են՝ շրջանառու (էներգաէֆեկտիվ) միջոցների համալրումը, էներգածառայությունները, գյուղատնտեսության ոլորտը՝ գյուղատնտեսական տեխնիկայի ձեռքբերման, ջերմոցային տնտեսությունների առումով։

Ի դեպ․ այս վարկատեսակի համար  վարկային հայտի ուսումնասիրության և վարկային փաթեթի կազմման և սպասարկման միանվագ վճար չի գանձվում։ Հիշեցնենք, որ «Կանաչ» վարկավորումն իրականացվում է  գերմանական  KFW բանկի  «Էներգաարդյունավետություն ՓՄՁ-ների համար» ծրագրի շրջանակներում։